सोमबार, जेष्ठ ७ २०८१
सोमबार, जेष्ठ ७ २०८१
मध्यान्तर संवाददाता
काठमाडौं । सरकारले बुधबार सार्वजनिक गरेको विवरण अनुसार देशैभर ३ हजार ४३९ जना कोरोनाका संक्रमित थपिएका छन् । पछिल्लो २४ घण्टामा थपिएको संक्रमित संख्या अहिलेसम्मकै उच्च हो ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले बुधबारको नियमित प्रेस ब्रिफिङमार्फत पछिल्लो २४ घण्टामा उल्लेखित संख्यामा कोरोना संक्रमित थपिएको पुष्टि गरे । योसहित हालसम्म संक्रमित हुनेको संख्या ९४ हजार २५३ पुगेको डा. गौतमले जानकारी दिए ।
२४ घण्टाभित्र १ हजार १२६ कोरोना संक्रमणबाट निको भएका छन् भने योसहित कुल निको हुनेको संख्या ६८ हजार ६६८ पुगेको मन्त्रालयले जनाएको छ ।
हाल देशभर सक्रिय संक्रमितको संख्या २५ हजार ७ रहेको छ । मृतक थप १५ जनामा कोरोना पुष्टि भएको छ । योसहित हालसम्म कोरोनाबाट ५ सय ७८ जनाको मृत्यु भएको मन्त्रालयले जनाएको छ ।
पछिल्लो २४ घण्टामा १४ हजार २०९ जनाको पिसिआर परीक्षण भएको डा. गौतमले बताए ।
