काठमाडौं । सिटिजन्स बैंक लिमिटेडले चालु आर्थिक वर्षको प्रथम त्रैमासिकमा ५१ करोडभन्दा माथि नाफा कमाएको छ । चालु आर्थिक वर्षको प्रथम त्रैमासको अपरिस्कृत वित्तीय विवरण सार्वजनिक गरेको बैंकले ५१ करोड ५५ लाख ९१ हजार रुपैयाँ खुद मुनाफा आर्जन गरको छ । गत आर्थिक वर्षको प्रथम त्रैमासमा ३४ करोड ९ लाख ६९ हजार खुद मुनाफा आर्जन गरेको बैंकको खुद मुनाफा समीक्षा अवधिमा ४७.६६ प्रतिशतले बढेको हो ।

खुद ब्याज आम्दानीसँगै अन्य आम्दानीमा भएको वृद्धि तथा सम्भावित कर्जा जोखिमबापतको व्यवस्थाबाट दुई करोड ५१ लाख रुपैयाँ राइट ब्याक गर्दा बैंकको आम्दानीमा वृद्धि भएको छ । जसले गर्दा बैंकको खुद मुनाफा पनि बढेको हो । आर्थिक वर्षको तीन महिनामा बैंकले ८३ करोड ९१ लाख ७३ हजर खुद ब्याज अम्दानी गरेको छ । जुन गत आर्थिक वर्षको सोही अवधिको भन्दा १८.४७ प्रतिशतले बढी हो । गत आबको प्रथम त्रैमासमा बैकले ७० करोड ८३ लाख २५ हजार खुद ब्याज आम्दानी गरेको थियो ।

बैंकले व्यवसाय विस्तार ४ प्रतिशले मात्रै गर्दा पनि बैंकको कोषको लागत घट्दा ब्याज खर्च घटेको छ । जसले गर्दा खुद ब्याज आम्दानी बढेको हो । असोज मसान्तसम्म बैंकले ९७ अर्ब ९४ करोड ६ लाख २२ हजार निक्षेप संकलन गरेर ८२ अर्ब ६४ करोड ८६ लाख २४ हजार कर्जा लगानी गरेको छ ।

गत वर्षको सोही अवधिको तुलनामा बैंकको निक्षेप १०.६७ प्रतिशत र कर्जा लगानी ४.६५ प्रतिशतले वृद्धि भएको छ । गत आबको सोही अवधिमा बैंकले ८८ अर्ब ४९ करोड ६२ लाख २८ हजार निक्षेप संकलन गरेर ७८ अर्ब ९७ करोड ६३ लाख ९५ हजार कर्जा लगानी गरेको थियो ।

असोज मसान्तमा ९ अर्ब ८ करोड ९८ लाख १७ हजार चुक्ता पुँजी रहेको बैंकको जगेडा कोषमा तीन अर्ब ९० करोड ५९ लाख ९८ हजार रहेको छ । त्यस्तै  सेयर प्रिमियममा ४१ लाख २४ हजार  र सेयरधनीलाई वितरण गर्ने सञ्चित कोषमा ९४ करोड ३७ लाख २३ हजार रहेको छ ।

बैंकको पुँजीकोष अनुपात १४.३८ प्रतिशत छ । कोभिड १९ को प्रभावले गर्दा बैंकको निस्क्रिय कर्जा बढेको छ । गत वर्ष ०.९८ प्रतिशत रहेको निष्क्रिय कर्जा बढेर १.४३ प्रतिशत पुगेको छ । त्यस्तै  कोषको लाग र आधार ब्याजदर पनि घटेको छ । बैंकको कोषको लागत ६.७९ प्रतिशत र आधार ब्याजदर ८.८१ प्रतिशत छ । गत वर्ष बैंकको कोषको लागत र आधार ब्याजदर क्रमशः ८.३० र १०.७५ प्रतिशत रहेको छ ।

बैंकको कर्जा स्रोत परिचालन अनुपात (सीसीडी रेसियो) ७३.५ प्रतिशत, प्रतिसेयर आम्दानी २२ रुपैयाँ ६९ पैसा, प्रतिसेयर नेटवर्थ १५३ रुपैयाँ ४० पैसा र मूल्य आम्दानीअनुपात ९.४८ गुणा छ ।

प्रथम त्रैमासमा बैंकको वितरणयोग्य मुनाफा भने ९२ लाख ७४ हजार मात्रै छ । कोभिड १९ले गर्दा निजी क्षेत्र प्रभावित बनेको र असोज मसान्तमा असुल हुनुपर्ने ब्याज असुल हुन नसक्दा असुल नभएको ब्याज रकम रेगुलेटरी रिर्जभमा राख्दा बैंकको वितरणयोग्य मुनाफा भने न्युन देखिएको हो । बैंकले ३४ करोड १७ लाख ६० हजार रुपैयाँ बराबर बयाज उठाउन नसक्दा रेगुलेटरी रिर्जभमा राखेको छ ।