फोर्ब्स । कोभिड– १९ ले व्यवसायिक साम्राज्यका ग्लोबल टाइकुनहरुलाई थला पारिरहेको बेला इकमर्श कम्पनी अमेजनका मालिक जेफ बेजोसलाई भने यो झन् फलिफाप सिद्ध भएको छ ।

त्यसै पनि संसारका सबैभन्दा धनाड्यको सूचीमा उक्लिएका बेजोस त्यसयता तल झर्नु परेको छैन । त्यसमाथि कोरोनाले अनलाइन किनमेल संस्कारमा विश्वव्यापीरुपमै परिवर्तन ल्याइदिँदा यसको सबैभन्दा ठूलो लाभ ग्लोबल अनलाइन चेनका रुपमा व्यापार विस्तार गरेको अमेजन र यसका संस्थापक तथा सीईओ बेजोसलाई मिलेको छ ।

बेजोसको धनमाथि धनको थुप्रो लाग्ने क्रमले बुधबार राती २०० अर्ब अमेरिकी डलरको आँकडा पार गरेको छ । ५६ वर्षे बेजोस धनको यो मुकाममा पुग्ने दुनियाँको पहिलो व्यक्ति बनेका छन् । फोर्ब्सले धनाड्यहरुको सूची सार्वजनिक गर्न थालेको चार दशको इतिहासमा नै ‘डबल सेन्टि–बिलिओनायर’ को यो माइलस्टोन कुनै पनि व्यक्तिले भेटेको पहिलोपटक हो ।

यसअघि ‘सेन्टि बिलिओनायर’ क्लबमा पर्ने दोस्रो व्यक्ति पनि बनेका थिए उनी । सन् २०१८ मा बेजोसको सम्पत्तिले एक सय अर्ब ‘सेन्टि विलियन’ डलर पार गरेको थियो । त्यसअघि माइक्रोसफ्टका फाउन्डर बिल गेट्सको खुद सम्पत्ति ‘नेट वर्थ’ सन् १९९९ मा सय अर्ब डलर नाघेको थियो, जसबेला माइक्रोसफ्टले व्यवसायिक वृद्धिको त्यतिन्जेलसम्मकै उचाई हासिल गरेको थियो ।

त्यतिबेला नै विश्वका सर्वाधिक धनाड्य गेट्सको नेट वर्थ आजको मूल्यमा १५८ अर्ब अमेरिकी डलरबराबर भएको मूल्यांकन छ । तर त्यसयता विश्वको स्वास्थ्य क्षेत्र तथा अन्य परोपकारी उद्देश्यका लागि ५० अर्ब डलरभन्दा बढी दान गरिसकेका गेट्स यही दानका कारण धनीको सूचीमा आगे–पिछे हुँदा अहिले दोस्रोमा छन् ।

उनीसँग ११६.१ अर्ब डलरको सम्पत्ति छ भने गत मंगलबार नयाँ सेन्टि बिलिओनायर बनेका फेसबुकका संस्थापक मार्क जुकरवर्गसँग अहिले १०९.१ अर्ब डलरको सम्पत्ति पुगेको फोर्ब्सले उल्लेख गरेको छ ।

फेसबुकको सेयरको मूल्य वृद्धिले गत मंगलबार एकैदिन जुकरवर्गको सम्पत्ति ३.४ अर्ब डलरले बढेको थियो । बुधबार पुनः जुकरवर्गको सम्पत्ति ६ अर्ब डलरले बढ्दा १०९.१ अर्ब डलर पुगेको हो ।

धनाड्यको सूचीमा तेस्रो स्थानमा छन् विश्वप्रसिद्ध फ्रेन्च फेसन ब्रान्ड लुइ भिट्टोनका अध्यक्ष तथा सीईओ बर्नार्ड आर्नल्ट । उनी र उनको परिवारको नामको रियल टाइम सम्पत्ति अहिले ११४.३ अर्ब अमेरिकी डलर छ । गत वर्ष ुसेन्टि बिलिओनायरु क्लबमा छिरेका उनको सम्पत्ति कोरोना व्यापक हुन शुरु गरेसँगै गत मार्चमा ८० अर्ब डलरमा झरेको थियो । मे महिनामा पुन उनको सम्पत्ति सय अर्ब डलरमा फर्किएको थियो ।

यसका बाबजुद विश्वका सबैभन्दा धनी बेजोससँग दोस्रो स्थानमा रहेका गेट्सको भन्दा ८८.५ अर्ब डलर बढीको सम्पत्ति रहेको छ भने जुकरवर्गको भन्दा ९५.५ अर्ब धेरैको ।

अमेजनको सेयरको मूल्य बुधबार २ प्रतिशतले उक्लिएपछि नेट वर्थ एकैदिन ४.९ अर्ब डलर बढेका बेजोस दुई सय अर्ब डलरको सम्पत्तिका मालिक बन्न पुगेका थिए । यससँगै उनीसँग २०४.६ अर्ब डलरको खुद सम्पत्ति पुगेको फोर्ब्सले उल्लेख गरेको छ ।

कोरोना भाइरस प्रकोपका कारण उपभोक्ताको किनमेल शैलीमा आएको परिवर्तका कारण आउटलेटमै पुगेर गर्ने भौतिक किनमेलमा ह्वात्तै कमी आउँदा ग्लोबल अनलाइन चेनका रुपमा व्यापार विस्तार गरेको अमेजनको आम्दानीमा ठूलो वृद्धि भएको छ । यही कारण यस कम्पनीको सेयर मूल्य कोभिड प्रभावका बीच पनि लगातार उकालो लागिरहँदा यसले बेजोसलाई झन्झन् धनी बनाउँदै लगेको हो ।

२०२० को जनवरीयता मात्र अमेजनको सेयर मूल्य ८० प्रतिशतले बढिसकेको छ । त्यसबेला बेजोसको सम्पत्ति ११५ अर्ब अमेरिकी डलरको थियो । अमेजनमा बेजोसको करिब ११ प्रतिशतमात्र सेयर भए पनि यो नै उनको ९० प्रतिशत सम्पत्ति वृद्धिको मूल स्रोत बनेको छ ।

गत वर्ष पूर्वपत्नी म्याकेन्जी स्कटसँग सम्बन्ध बिच्छेद नगरेका हुन्थे भने बेजोस अहिलेभन्दा अझ बढी धनी हुन्थे । अहिलेसम्मकै ुसर्वाधिक महँगो सम्बन्ध बिच्छेदु का रुपमा चर्चित स्कटसँगको सम्बन्ध अन्त्य गर्दा बेजोसले अमेजनको आफ्नो सेयरको २५ प्रतिशत सेयर पूर्वपत्नीलाई दिएका थिए, जसको मूल्य अहिले ६३ अर्ब अमेरिकी डलर रहेको छ ।

बेजोसकी पूर्वपत्नी स्कट यो वर्ष १.७ अर्ब डलर दान दिएर पनि अहिले विश्वको चौधौं धनी महिलामा संसारकी दोस्रो धनी व्यक्ती हुन् ।

अमेजनबाहेक बेजोसको लगानी वासिङटन पोस्ट, एरोस्पेश कम्पनी ब्लु ओरिजिन र अन्य प्राइभेट इन्भेष्टमेन्टहरुमा पनि रहेको छ ।