काठमाडौं । अर्थमन्त्री डा. युवराज खतिवडाले नेपालमा लगानी गर्न भारतीय निजी क्षेत्रलाई पुनः आह्वान गरेका छन् । नेपालमा लगानीको उपयुक्त वातावरण बनेको दाबी गर्दै खतिवडाले त्यो अवसर नगुमाउन वैदेशिक लगानीकर्ताहरुको ध्यानाकर्षण गराए ।
काठमाडौंमा भएको नेपाल–भारत लगानी प्रदर्शनी तथा सम्मेलनको दोस्रो दिन बिहीबार उनले मुलुकको समृद्धिका लागि सरकारले वैदेशिक लगानी र प्रविधि भित्र्याउन जोड दिएको स्पष्ट पारे । खतिवडाले नेपालको आर्थिक विकासमा भारतीय युवा उद्यमीहरुको अनुभव उपयोगी हुने विश्वास व्यक्त गरे ।
कार्यक्रममा नेपालका लागि भारतीय राजदुत मञ्जीवसिंह पुरीले दुई मुलुकबीचको व्यापार विस्तारका लागि सम्मेलन उपयोगी हुने बताए । उनले भारतको ब्रान्डेड बस्तुहरुको अनुभव लिएर नेपालले पनि ब्रान्डेड बस्तुहरु उत्पादनमा जोड दिन सक्ने उल्लेख गरे ।
नेपाल उद्योग वाणिज्य महासंघ, भारतीय दुतावास र ईन्डियन फ्रेन्जाइज कम्पनीको संयुुक्त आयोजनामा गरिएको सम्मेलनमा ६० वटा भन्दा बढि ब्रान्डेड कम्पनीका उद्यमीहरु सहभागी भएका छन ।