धनगढी । सुदूरपश्चिम विश्वविद्यालय केन्द्रीय क्याम्पसमा कर्मचारी भर्ना गर्दा मनामानी ढंगले कर्मचारी भर्ना गरेका भन्दै सुरु भएको आन्दोलन अन्र्तगत आज कालोपट्टी बाँधेर विद्यार्थी पठन पाठन गरिएको छ ।

क्याम्पस प्रमुखले मनोमानी तरिकाले कर्मचारी राखेको भन्दै विद्यार्थीले सुरु गरेको आन्दोलनमा अभिभावक, प्राध्यापकलगायत सबैले समर्थन गरेका छन् । प्रक्रिया मिचेर गरिएको कर्मचारी भर्नाविरुद्ध एकत्रित भएका सुदूरपश्चिम विश्वविद्यालयका आन्दोलनरत प्रााध्यापकले विरोध स्वरुप आन्दोलनका कार्यक्रम सार्वजनिक गरेका छन् । उनीहरुले विरोध स्वरुप दोस्रो दिन सोमबार हातमा कालो पट्टी बाँधेर पठनपाठन गरेका छन् ।

आन्दोलनको कार्यक्रम अन्तर्गत प्राध्यापकहरुले सोमबार हातमा कालो पट्टी बाधेर पठनपाठन गर्ने, सोमबार दिउँसो पत्रकार सम्मलेन गर्ने, मंगलबार मुख्यमन्त्री त्रिलोचन भट्टलाई ज्ञापनपत्र बुझाउने सार्थ कुलपति र उपकुलपतिलाई समेत ज्ञापन पत्र पठाउने जनाएका छन् । यस्तै, बिहिबार जिल्लास्थित सभासद्, राजनीतिक दलका प्रमुख, जनप्रतिनिधी, बुद्धिजीवि, अभिभावक लगायतको उपस्थितिमा खुला बहस तथा अन्तर्क्रिया गर्ने कार्यक्रम तय गरेका छन् ।

क्याम्पस प्रमुखले प्रक्रिया मिचेर कर्मचारी भर्ना गरेकाले त्यस्तो निणर्य बदर नभएसम्म आफूहरुले दवाबमूलक आन्दोलन जारी राख्ने प्राध्यापक संघका सचिव देवसिंह नाथले बताए ।

उनले पठनपाठन नै बन्द गरेर आन्दोलन गर्दा विद्यार्थीलाई मर्का पर्ने भएकाले आफूहरु शान्तिपूर्ण तरिकाले विरोधमा उत्रिएको बताउनुभयो । ‘विद्यार्थी, अभिभावक, बुद्धिजीविको यो आन्दोलनमा हाम्रो पनि समर्थन छ’, उनले भने ‘प्राध्यापकका नाताले हामीले पनि विकृति र विसंगतिका विरुद्ध आवाज उठाउनै पर्छ ।’

क्याम्पसमा भइरहेको विकृति विसंगतिकाविरुद्ध आमनागरिक र विद्यार्थीले उठाएको विरोधमा आफूहरुको पनि समर्थन रहेको प्राध्यापकहरुको भनाई छ । यता, कर्मचारी भर्नाकै विषयमा असन्तुष्टि जनाउँदै चार विद्यार्थी संगठन र इन्टीग्रेटी फोरमको आन्दोलन पनि जारी छ ।