काठमाडौं । देशैभर पछिल्लो २४ घण्टामा थप १२ सय ४ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले शनिबार नियमित प्रेस ब्रिफिङमार्फत उल्लेखित संख्यामा कोरोना संक्रमण भएको पुष्टि गरेका हुन् । योसँगै नेपालमा कोरोना संक्रमितको कुल संख्या ६२ हजार ७९७ पुगेको छ।
शुक्रबार २०२० जनामा संक्रमण पुष्टि भएको थियो । शुक्रबारको तुलनामा शनिबार झण्डै ५० प्रतिशत नै संक्रमितको संख्या घटेको छ ।
प्रवक्ता डा. गौतमका अनुसार १७ हजार १२९ कोरोनाका सक्रिय संक्रमित छन् भने होम आइसोलेसनमा ७ हजार ९४८ जना र संस्थागत आइसोलेसनमा ९ हजार १५३ जना रहेका छन् । मन्त्रालयका अनुसार १७९ जनाको आइसीयूमा र ३५जनाको भेन्टिलेटर उपचार भइराखेको छ ।
त्यस्तै २४ घण्टामा १४ सय ४७ जना कोरोना जितेर डिस्चार्ज भएका छन् । योसँगै कुल डिस्चार्ज हुनेको संख्या ४५ हजार २६७ पुगेको छ ।
कोरोना संक्रमणले २४ घण्टामा ११ जनाको मृत्यु भएको छ । योसहित कोरोना संक्रमणबाट मृत्यु हुनेको कुल संख्या ४०१ पुगेको मन्त्रालयले जनाएको छ ।