काठमाडौं । देशैभर पछिल्लो २४ घण्टामा थप १३ सय २५ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले आइतबारको नियमित प्रेस ब्रिफिङमार्फत उल्लेखित संख्यामा कोरोना पुष्टि भएको जानकारी दिए । योसँगै कोरोना संक्रमितको कुल संख्या ६४ हजार १२२ पुगेको छ।
प्रवक्ता डा. गौतमका अनुसार १९० जनाको आइसीयूमा र ३६ जनाको भेन्टिलेटर उपचार भइराखेको छ। त्यस्तै १७ हजार ४७८ जना कोरोनाका सक्रिय संक्रमित छन् ।
२४ घण्टामा ९६६ जना कोरोना जितेर डिस्चार्ज भएको मन्त्रालयले जनाएको छ । योसँगै कुल डिस्चार्ज हुनेको संख्या ४६ हजार २३३ पुगेको छ।
त्यस्तै मन्त्रालयले सार्वजनिक गरेको विवरण अनुसार कोरोनाले २४ घण्टामा १० जनाको मृत्यु भएको छ भने योसहित नेपालमा कोरोना संक्रमणबाट मृत्यु हुनेको संख्या ४११ पुगेको छ ।