काठमाडौं । मेडिकल शिक्षामा विद्यार्थीसँग अवैध शुल्क असुल गरिरहेको खुलासा भएपछि किस्ट मेडिकल कलेजमाथि छानविन सुरु भएको छ । विद्यार्थीबाट तोकिएभन्दा बढी र पटक–पटक विभिन्न शिर्षकमा अतिरिक्त शुल्क लिएको विषयमा एक राष्ट्रिय दैनिकले समाचार प्रकाशन गरेपछि कलेजको अवैध धन्दाबारे खुलासा भएको हो । कलेजको अवैध शुल्कविरुद्ध आवाज उठाउने वा उजुरी गर्ने विद्यार्थीलाई आन्तरिक परीक्षामा फेल गराएर बोर्डको परीक्षाबाट वञ्चित गर्ने गरेको समाचार बाहिरिएपछि प्रधानमन्त्री केपी ओलीले कलेजमाथि छानविन गर्न निर्देशन दिएका थिए ।

शिक्षा मन्त्रालयका सहसचिव डा. हरि लम्सालको नेतृत्वमा राष्ट्रिय सतर्कता केन्द्रका अधिकारीसहितको टोलीले छानबिन प्रक्रियालाई अगाडी बढाएको छ । प्रारम्भिक छानबिनमा कलेजले विद्यार्थीसँग लिएको अतिरिक्त रकम मेडिकल काउन्सिललाई बुझाउनुपर्ने भएकाले उठाएको बताएको छ । तर, मेडिकल काउन्सिलका अध्यक्ष प्रा.डा. धर्मकान्त बास्कोटाले यस्तो कार्य गलत भएको भन्दै सरकारले तोकेको ३८ लाख ५० हजारभित्रै सबै किसिमका शुल्क समावेश भएकाले थप शुल्क उठाउन नपाइने बताए ।

पटक–पटक अतिरिक्त शुल्क उठाउँदै आएको कलेजले गत असोजमा प्रतिविद्यार्थी ९० हजारका दरले थप शुल्क मागेको थियो । सो रकम नदिएमा परीक्षामा बस्न नदिने धम्की दिएपछि ६९ विद्यार्थीले जिल्ला प्रशासन कार्यालय ललितपुरमा उजुरी दिएका थिए । प्रशासनको हस्तक्षेपपछि कलेजले विद्यार्थीसँग अतिरिक्त रकम नलिने जनाएपनि कलेजले भित्रि रुपमा दवाव सिर्जना गरी थप शुल्क मात्र उठाएन, उजुरी गर्ने विद्यार्थीलाई छानीछानी फेल समेत गरायो ।

शिक्षकले कापी जाँच्दा पास भएका विद्यार्थीलाई पनि सञ्चालकले फेल गराएका थिए । कलेजको आन्तरिक परीक्षामा फेल भएका विद्यार्थीले बोर्ड परीक्षा दिन पाउँदैनन् । त्यसैले विद्यार्थीले मेडिकल काउन्सिलमा उजुरी गरेका छन् । विद्यार्थीमाथि अन्याय भएको भन्दै दुई प्राध्यापकले राजीनामा समेत दिएका छन् । अहिले कलेज प्रशासनको दवावमा उजुरी गर्ने विद्यार्थी पनि अप्ठ्यारोमा पार्ने डरले खुल्न सकेका छैनन् । कलेजले मौन बसेमा शुल्क फिर्ता दिनेदेखि नतिजा सच्याइदिनेसम्मको प्रलोभन देखाइरहेको नाम उल्लेख नगर्ने सर्तमा एक विद्यार्थील भने– ‘अन्यथा आफ्नै भविष्य अन्योलमा पर्ने कलेजले धम्की दिएको छ ।

मेडिकल कलेजबाट अवैध शुल्क लिइरहेको विषयमा छानविन भइरहेको शिक्षा मन्त्रालय सहसचिव डा. हरिप्रसाद लम्साल बताए । उनले भने– ‘प्रधानमन्त्रीले नै चासो दिएर सत्य–तथ्य पत्ता लगाउन छानविन गर्न निर्देशन दिनुभएपछि मसहितको टोलीले शुक्रबारबाट कलेजको शुल्क, परीक्षालगायत विषयमा छानबिन सुरु गरेका छौँ , केहि दिनभित्रै परिणाम बाहिर ल्याउने छौं।’ अहिले लम्सालसहित सतर्कता केन्द्रबाट एसपी कमलप्रसाद अधिकारी, शिक्षा मन्त्रालयका उपसचिव विष्णु मिश्र र सतर्कता केन्द्रकै प्रहरी निरीक्षक बुद्धिराम खनालको समुहले कलेजमाथि आवश्यक छानबिन गरिरहेको छ ।