Online Nepal सोमबार, असोज १७ २०७९

‘बार्दलीमा जून’ लिएर आइन शान्ति शर्मा, भव्य समारोहका बीच लोकार्पण

‘बार्दलीमा जून’ लिएर आइन शान्ति शर्मा, भव्य समारोहका बीच लोकार्पण


मध्यान्तर संवाददाता
  • शनिबार, माघ २५ २०७६

  • काठमाडौं । सोलुखुम्बुकी स्रष्टा शान्ति शर्माको दोस्रो कृति मुक्तक सङ्ग्रह ‘बार्दलीमा जून’ राजधानीको बानेश्वरमा रहेको लेखनकुञ्जको सभाहलमा भव्य समारोहका बीच लोकार्पण गरियो । सिमल बुक पब्लिकेशनले प्रकाशन गरेको उक्त कृतिको लोकार्पण समारोहमा परराष्ट्र मन्त्री एवं साहित्यकार प्रदीप ज्ञवाली प्रमुख अतिथिको रूपमा उपस्थिती थियो ।

    त्यसैगरि ज्ञानुवाकर पौडेल, प्रा. डा. रामप्रसाद ज्ञवाली, डा. कुमार कोइराला, डा. देवी नेपाल, सांसद आङ दावा शेर्पा, रामकाजी कोने, रमेश पौडेल, वियोगी बुढाथोकी, प्रोल्लास सिन्धुलीय, नन्दकृष्ण जोशी, वशिष्ठ अधिकारी, कलानिधि दाहाल, नन्दु उप्रेती, विजयध्वज थापा, सुनिल अधिकारी लगायत थुप्रै साहित्यकार एवं साहित्यानुरागी व्यक्तित्वहरूको बाक्लो उपस्थिति रहेको थियो ।

    कार्यक्रममा बोल्दै प्रमुख अतिथि परराष्ट्र मन्त्री ज्ञवालीले साहित्यले मानवमा सकारात्मक उर्जा भर्नु पर्दछ भन्दै शान्ति शर्माका मुक्तकमा आफूले त्यस्तो उर्जा पाएको बताए । पुस्तकमाथि आफ्नो अत्यन्त आकर्षक समालोचकीय मन्तव्य प्रस्तुत गर्दै प्रा. डा. रामप्रसाद ज्ञवालीले पुस्तकमा प्रणय र परिवेश गरि दुई प्रकारका मुक्तकबाट समाजका विविध विषय समेटिएको उल्लेख गरेका थिए । उनले प्रेम निःस्वार्थी नहुने तथा सौन्दर्य आफ्नो इच्छा र चाहना अनुसार फरक हुने कुरा दृष्टान्तसहित व्यक्त गरे ।

    डा. कुमार कोइरालाले मुक्तक लेखनको विषयमा मुक्तक विधाको सल्यक्रिया गरेका थिए भने ज्ञानुवाकर पौडेलले पुस्तकमा अरू स्थापित साहित्यकारबाट भूमिका लेखाएर कृतिलाई बैशाखी टेकाउने काम नगरेकोमा कृतिकारलाई बधाई दिए । डा. देवी नेपालले शर्माको व्यक्तित्व र कृतित्वमाथि प्रकाश पारेका थिए । कार्यक्रमको सभापतित्व गरेका लेखन कुञ्जका सँस्थापक कमल ढकालले साहित्यमा उर्जा हुने बताउँदै त्यही उर्जाले मृत्युको मुखमा पुगेर पनि बाँच्न सकिने तर्क राखेका थिए । मुक्तकबाट शुरु गरेर मुक्तकबाटै अन्त्य गरिएको कृतिकार शान्ति शर्माको मन्तव्यले सबैलाई मन्त्रमुग्ध पारेको थियो ।

    चर्चित कार्यक्रम प्रस्तोता सरोज घिमिरेले कार्यक्रमलाई मुक्तक झैँ बान्किलो ढङ्गले प्रस्तुत गर्दै गर्दा मुक्तककार प्रकाश बस्नेत गफाडी र शिवराम खड्काले कृतिबाट दुई–दुईवटा मुक्तक वाचन गरेर थप रौनकता प्रदान गरेका थिए । मुक्तककार शर्माको यस अघि नै गजल सङ्ग्रह ‘अम्लान फूल’ प्रकाशित छ । मुक्तककार शर्मा दियालो साहित्य सरगमकी अध्यक्षसमेत छिन् ।

    प्रतिक्रिया
    थप समाचार