काठमाडौं । भक्तपुरको मध्यपुर थिमी नगरपालिकाका एक युवकको कोरोना संक्रमणका कारण मृत्यु भएको छ । भदौ ४ गते कोरोना संक्रमण पुष्टि भइ उपचारको क्रममा पाटन अस्पतालमा मंगलबार राति मृत्यु भएको हो ।
मध्यपुर थिमी नगरपालिका– ७ का ४० वर्षिय ति युवककोअस्पतालको भेन्टिलेटरमा राखेर उपचारका क्रममा मृत्यु भएको उपमेयर अञ्जनादेवी मधिकर्मीले जानकारी दिइन् ।
युवकमा कोरोना संक्रमण देखिएपछि परिवारका सदस्यहरुमा परीक्षण गर्दा उनको बाबु, आमा, पत्नी र दुई छोराछोरीमा पनि संक्रमण पुष्टि भएको थियो ।
कोरोना संक्रमणकै कारण उनकी आमाको भदौ १३ गते पाटन अस्पतालमै मृत्यु भएको मधिकर्मीले बताइन् ।
युवकको बुधबार पशुपति आर्यघाटमा अन्त्येष्टि गरिएको छ भने उनको बाबु, गर्भवती श्रीमती र छोराछोरी होम आइसोलेसनमा नै रहेका उपमेयर मधिकर्मीले जानकारी दिइन् ।