काठमाडौं । अर्थ मन्त्रालयले राष्ट्रिय वाणिज्य बैंकको सञ्चालकमा प्रा डा उपेन्द्र कोइरालालाई नियुक्त गरेको छ। अर्थमन्त्री डा युवराज खतिवडाले आफ्नो कार्यकाल सकिनलाग्दा सोमबार मन्त्रीस्तरीय निर्णय मार्फत् कोइरालालाई वाणिज्य बैंकको रिक्त रहेको सञ्चालक पदमा नियुक्त गरेका हुन्।
उनी उपप्रधामन्त्री तथा रक्षामन्त्री ईश्वर पोखरेलका सम्धी हुन् । स्रोतले दिएको जानकारी अनुसार उपप्रधानमन्त्री पोखरेलकै दबाबमा उनलाई त्यहाँ लगिएको हो । अर्थ मन्त्रालय स्रोतले उनको नियुक्तिको पुष्टि गरेको छ । स्रोतले दिएको जानकारीअनुसार कोइरालालाई वाणिज्य बैंकको सञ्चालक समितिको अध्यक्ष बनाउने गरी उनलाई सञ्चालक नियुक्त गरिएको हो ।
वाणिज्य बैंक सञ्चालक समितिले अध्यक्षको चयन गर्नेछ तत्कालीन् अध्यक्ष निर्मलहरि अधिकारी राजस्व बोर्डको सदस्य नियुक्त भएसँगै कोइरालाई लगिएको छ।कोइराला तत्कालीन नेकपा एमालेका तर्फबाट धेरै राजनीतिक नियुक्ति पाउने व्यक्तिमध्ये पर्छन्। उनले यसअघि खाद्य संस्थान र नेपाल आयल निगममा नियुक्ति पाएका थिए। कोइराला २०६१ सालमा आयल निगमको कार्यकारी निर्देशक भएका थिए। उनलाई तत्कालीन आपूर्ति मन्त्री ईश्वर पोखरेलले नै त्यहाँ लगेका थिए।