मंगलबार, बैशाख २५ २०८१
मंगलबार, बैशाख २५ २०८१
मध्यान्तर
काठमाडौं । एनसेलले एसईई दिएर बसेका विद्यार्थीलाई लक्षित गर्दै ‘पहिलो सिम’ अफर योजना प्रस्तुत गरेको छ । यो पहिलो सिमको मूल्य जम्मा १ रुपैयाँ कायम गरिएको छ । सिममा दिन र रातको डाटा प्याक, प्रत्येक पटकको रिचार्जमा एसएमएस र डाटा बोनस तथा माइ फाइभको सुविधा दिइएको एनसेलले जनाएको छ ।
यो योजनामा सहभागी हुने विद्यार्थीहरूले आफ्नो नजिकैको एनसेल सेन्टरबाट सिम प्राप्त गर्न सक्ने कम्पनीले जनाएको छ । सिम प्राप्त गर्न विद्यार्थीहरूले एसईई परीक्षा दिएको प्रवेशपत्र र अभिभावकका नागरिकताको प्रतिलिपि र पासपोर्ट साइजको फोटो एक थान लिएर जानुपर्नेछ ।
एसईई सिममा समाविष्ट अफर अन्तर्गत मात्र १७ रुपैयाँ ७० पैसामा दैनिक डाटा प्याकहरूः दिनको प्याकमा ३०० एमबी, जुन बिहान ५ बजेदेखि साँझ ५ बजेसम्म कायम रहनेछ र रातको प्याकमा असीमित इन्टरनेटको सुविधा रहेको छ । यसैगरी, राति ११ बजेदेखि बिहान ७ बजेसम्म कायम रहनेछ ।
सिम सुचारु गरेपछि यदि ग्राहकले ५० रुपैयाँ वा त्यसभन्दा बढीको रिचार्ज गरेपछि २४ घण्टाका लागि १०० एमबी डाटा र १०० एसएमएस सित्तैमा प्राप्त गर्ने र माइ फाइभ सेवा एक वर्षका लागि निःशुल्क प्राप्त हुने सो कम्पनीले जनाएको छ । कम्पनीका अनुसार यसमा ग्राहकले कुनै पनि पाँचवटा एनसेल नम्बरसँग ३० दिनका लागि शून्य पैसामा र ३० दिनपछि शून्य दशमलव ९९ पैसामा ११ महिनाका लागि जोडिन सक्नेछन् । शुक्रबारदेखि लागु भएको यो पहिलो सिम अफर ३ महिनासम्म कायम रहने कम्पनीले जनाएको छ ।
