काठमाडौं । नेपाल इन्भेष्टमेन्ट मेगा बैंकको ३७ औं वार्षिक साधरण सभा सम्पन्न भएको हो । मंगलवार सञ्चालक समितिका अध्यक्ष पृथ्वी बहादुर पाँडेको अध्यक्षतामा सम्पन्न भएको उक्त साधारण सभाले गत आर्थिक वर्ष ०७९-८० को वासलात लगायतका थुप्रै एजेण्डाहरु सर्वसम्मतिले पारित गरेको छ ।

आर्थिक वर्ष २०७९-८० मा बैंकले ३ अर्ब ७२ करोड रुपैयाँ खुद मुनाफा आर्जन गर्न सफल भएको छ । आर्थिक वर्ष २०७८-७९  बैंकले कूल निक्षेप ३ खर्ब ४३ अर्ब रुपैयाँ रहेकोमा १६ अर्ब ९७ करोड रूपैयाँले बृद्धि भई आर्थिक वर्ष २०७९-८० को अन्त्यमा बैंकको निक्षेप ३ खर्ब ६० अर्ब रुपैयाँ पुगेको छ ।

त्यसैगरी आर्थिक वर्ष २०७९-८० को अन्त्यमा बैंकको कूल कर्जा तथा सापटी रकम ३ खर्ब १२ अर्ब रुपैयाँ कायम रहेको छ । अघिल्लो आर्थिक वर्षको अन्त्यमा साविक नेपाल इन्भेष्टमेण्ट बैंक लिमिटेड र मेगा बैंक नेपाल लिमिटेडको गरी कूल कर्जा तथा सापटी रकम ३ खर्ब १४ अर्ब रुपैयाँ रहेको थियो । मेगा बैंकले बिगतमा प्रदान गरेको केही खराब कर्जाका कारण मुनाफा कम भएपनि बैंकका अन्य सूचकहरु सकारात्मक रहेका छन् ।

विगत केही वर्षदेखि नेपाल राष्ट्र बैंकले बैंकहरुको संख्या घटाउन लिएको मर्जर नीतिलाई समर्थन गर्दै आर्थिक वर्ष २०७९-८० मा साविक नेपाल इन्भेष्टमेण्ट बैंक लिमिटेड र मेगा बैंक नेपाल लिमिटेड एक आपसमा गाभिई २०७९ पुस २७ गतेबाट नेपाल इन्भेष्टमेण्ट मेगा बैंक लिमिटेडको नाममा एकीकृत कारोबार सञ्चालन गरेको थियो ।

मर्जरपछि यो बैंकको चुक्ता पूँजी ३४ अर्ब १३ करोड रुपैयाँ र कुल शेयरधनी कोष ५५ अर्ब ६० करोड रुपैयाँ पुगेको छ ।

हाल बैंकले २७० शाखा, २६७ एटीएम, १६ राजश्व संकलन काउन्टरसहित ६३ एक्टेन्सन काउन्टर र ४६ शाखारहित बैंकिङमार्फत ३२ लाख भन्दा बढी ग्राहकहरूलाई सेवा दिँदै आएको छ । गुणस्तरीय सेवा तथा सुविधा प्रदान गरेका कारण समीक्षा अवधिमा बैंकले अन्तराष्ट्रिय प्रकाशन-युरोमनीबाट “बेस्ट बैंक २०२३” को उपाधि समेत प्राप्त गर्न सफल भएको छ ।

सर्वोच्च अदालतको निर्णयलाई पालना गर्दै सञ्चालकहरूको निर्वाचन हाललाई स्थगित गरिएको बैंकले जनाएको छ भने साधारणसभामा प्रस्तुत भएका अन्य सबै एजेण्डाहरु सभाद्वारा स्वीकृत र अनुमोदन भएका छन् ।