काठमाडौं । पाकिस्तानी सेनाले भारतका दुईवटा भारतिय लडाकु विमान खसालिएको दाबी गरेको छ । यसको बारेमा पाकिस्तानी सेनाका प्रवक्ता मेजर जनरल आसिफ गफूरले ट्वीट गर्दै जानकारी दिएका छन् ।
उनले ट्वीट गर्दै भनेका छन्, भारत–पाकिस्तान वायुसीमा नाघेर पाकिस्तानी आकाशमा छिरेका ती भारतीय विमानलाई पाकिस्तानी वायुसेनाले खसालिदिएको दाबी गरेका हुन् ।
उनका अनुसार एक भारतीय विमानचालकलाई पक्राउ गरिएको बीबीसीले जनाएको छ । पाकिस्तानी वायुसेनाले कारबाही गरेपछि एउटा विमान पाकिस्तान प्रशासित कश्मीर र अर्को भारत प्रशासित कश्मीरमा खसेको उनले दाबी गरेका छन् ।
भारतीय सञ्चारमाध्यमहरूका अनुसार भारतीय वायुसेनाका ती विमानमा प्राविधिक समस्या भएको र पाकिस्तानले दाबी गरेजस्तो नभएको जनाएका छन् ।
यसअघि विदेश मन्त्रालयका प्रवक्ताले पाकिस्तानी वायुसेनाले आफ्नो आकाशभित्रै रहेर भारत–पाकिस्तान नियन्त्रणरेखापारि बम हानेको बताएका थिए ।
तर यो भारतले मंगलवार गरेको आक्रमणको प्रत्युत्तर नभएको र त्यसैले धनजनको क्षति नहुने गरी कारबाही गरिएको मोहम्मद फैसलले बताएका छन् ।
समाचारसंस्था पीटीआई र रोयटर्सका अनुसार पाकिस्तानी विमान भारतीय आकाशमा प्रवेश गरेका हुन् । ती विमानहरू जम्मू–कश्मीरको राजौरी क्षेत्रमा छिरेको बताइएको छ ।
पीटीआईका अनुसार भारतीय विमानहरूले पाकिस्तानी विमानहरूलाई भाग्न बाध्य पारिदिएका थिए ।